كيفيه احتساب اهلاك الاصول الثابتة شرح تفصيلى مبسط
ليه بحسب اهلاك الاصول الثابته؟
تفتكروا ايه المدلول اللى بنفهمة من القيد د ه؟
من ح / مصروف الاهلاك dep,expenseالى ح / مجمع الاهلاك Acc,dep
تعالوا نبص على الامور من فوق شويتين عشان نفهم القصه ماشيه اذاي ونسيستم الدنيا شويتين
فى البدايه خلونا نتفق ان اللى بيميز شغلك كمحاسب فاهم انت بتعمل ايه وعارف مين بيودى على فين هو تطبيقك للاسس والمبادئ المحاسبيه المتعارف عليها..
من أهم الأسس المحاسبيه
اللى بنطبقها فىشغلنا وبنفصح عنها صراحتا وبيسببلنا مشاكل مع غير المحاسبين هو أساس الاستحقاق ..
بيقول ايه أساس الأستحقاق ده؟؟
اساس الاستحقاق بيقولى ياباش محاسب حمل السنه الماليه بتاعتك بما يخصها من مصروفات وبما يخصها من ايراد بصرف النظر عن انك دفعت مصروفك ده كاش او اتحسب عليك اجل ..
وبصرف النظر عن انك حصلت ايراداتك كاش أو حملتها على حساب العملاء اجل عشان فى النهايه مبلغ صافى الربح اللى بيطلع من قايمه الدخل بنسميه صافى الربح المستحق عن العام
وبكدا لما بعمل قيد بيع اجل بيقول:
من ح / العميل
الى ح / المبيعات
بعترف بايراد دخلى السنادي رغم انى ماحصلتوش ودا لانى السنادي حققت فيها البيع
ولما بعمل القيد ده :
من ح / مصروف الاهلاك
الى ح / مجمع الاهلاك
بعترف بمصروف اهلاك السنادي وبخصمه من الايراد رغم انى ماطلعتش اى فلوس من الخزنه او البنك
#نرجع_لموضوعنا :
كيفيه احتساب اهلاك الاصول الثابتة
لما بنشترى اصل ثابت عشان نستخدمه فى شغلنا وليكن مثلا ب 100.000ج بنقول
100,000 من ح / الاصل الثابت
100,000 الى ح / الكاش او الدائنين
مافيش اى تأثير حصل على القوائم الماليه غير ان الفلوس طلعت من بند الاصول المتداوله في شكل فلوس وبقت على بند الاصول الثابته فى شكل سيارات او الات فى نفس الميزانيه
المفروض ان ال100,000ج دول فلوس طلعت منى عشان استفيد بيها لفترات جايه فمن باب العداله انى اوزع التكاليف دي على سنوات الاستفاده منها مش اول سنه بس
يعنى فى اول سنه بقول انى استفدت من الاصل اللى كنت شاريه ب10000 ده بمقدار 10%
فابقول :
10,000 ج من ح / مصروف الاهلاك
10,000 ج الى ح / مجمع الاهلاك
مصروف الاهلاك
برميه فى قايمه الدخل ومجمع الاهلاك بخصمه من قيمه الاصل عشان اوصل لقيمته الدفتريه اللى هاتساوى 90,000 ج فى اخر اول سنه وبكدا ضربت عصفورين بحجر
#الاول انى ماظلمتش السنادى وحملتها بال100,000كلهم لا دا انا بقول ان السنادى استفادت ب 10% من الاصل يبقا تتحمل ب 10 % من تكلفته
وهكذا لباقى السنوات وبكدا طبقت اساس الاستحقاق وماشي صح
#ثانيا ودا الاهم بقول ان القيمه الصافيه للاصل بتاعى بعد ماشيلت منه رصيد مجمع اهلاكه بقت ب90000 ج
وبكدا انا شغال وعينى على الاصل ومنتبه ان كمان شويه هاحتاج اجدد الاصل ده او استبعده واشيل غيره قبل مارصيده يوصل لصفر واقع فى ازمه واقدر استعد لخطه الاحلال والتجديد...
عرفتوا ليه بنحسب اهلاك لاصول الثابته؟
لو محتاج تعرف 5 طرق لاحتساب الاهلاك بطريقة عملية من خلال الرابط دا 👇👇
دا فيديو توضيحى ايضا لاهلاك الاصول الثابتة
أضف تعليق