ما الذى يجب ان تتعلمة عن كيفية التسجيل فى دفتر اليومية من خلال القيد المزدوج
كيفية التسجيل في دفتر اليومية من خلال القيد المزدوج
لكن مش هينفع اعمل القيد المزدوج لعملية شراء نقدي مثلا بنر دعائي كبير باأني اقول اشتريت بضاعة ب 1000 ودفعت 1000 جنيه.
كلام مش عملي بالذات لما تبقي العمليات كتيرة في المنشات الكبيرة.
كيفيه الحل
الحل ان احنا هنختصر الكلام ده وهنستخدم من والي ...تقابلني مشكلة امتي اقول من وامتي اقول الي وانا عارف ان دي مشكلة ناس كتير منهم ناس حافظين القيود...
لا احنا هنا هنفهم الفكرة ان شاء الله بحيث لو قابلتنا عملية مسمعتش عنها قبل كده اعمل قيدها صح بكل بساطه.
عاوز بس اطلع بره الموضوع مؤقتا بكلام له علاقة قوية بالموضوع لازم نعرفه وبعدين نخش علي الموضوع فمحدش يقلق عشان نعمق الفهم.
- لازم تعرف في البداية اننا هنتعامل مع المشروع وكانه شخص قائم بذاته ومنفصل تماما عن صاحبه وهيتعامل مع صاحبه نفس معاملة الغريب
.يعني لو صاحب المشروع جاب فلوس حطها في المشروع المشروع هيقول معايا فلوس وعليه لصاحبي فلوس نفس الوضع لو المشروع استلف من الغريب..
الفرق ان المشروع هيسمي الاولي راس مال والتانيه دائنون وهكذا في كل التعاملات.
ركز معايا في الجاي 🙄🙄 ..
لو حضرتك عاوز تعمل مشروع تجاري فانت بتحسب كل احتياجاتك في البداية وتشوف معاك فلوس كام وممكن تكفي او هتستلف جزء من البنك او من صاحبك او من الاتنين وبعدين تبدا تشتري احتياجاتك كلها.
يعني عملي انا لقيت المشروع محتاج 300000 معايا منها 150000 وهستلف من البنك 100000 وهستلف من صاحبي 50000
يبقي كده مصدر امول المشروع 3 مصادر وهما
- راس المال
- قرض
- دائنين
هسلمهم للمشروع (كشخصية ) يبقي لغاية حالا لو سالت المشروع بتملك ايه؟ وعليك ايه؟ هيرد
بملك نقديه 300000
- وعليه 150000 لصاحبي (راس المال)
- وعلية 100000 قرض للبنك
- وعليه 50000 للدائنين
لاحظ من البداية ان مصادر الاموال لازم تساوي استخداماته يعني هنا النقدية تساوي اللي علي المشروع للغير (هي دي معادلة الميزانية)
يعني ما يملكه المشروع (النقدية) لازم يساوي التزامات المشروع او مطلوبات المشروع او خصوم المشروع .
فلو فرضنا ان المشروع اشتري ارض ب 50000 يبقي الاصول او الممتلكات اصبحت ارض 50000 و250000نقدية والخصوم زي ماهي 3 عناصر مجموعهم 300000
ولو المشروع اشتري مبني وسيارة والات واثاث وبضاعه وتم اضافة جزء في البنك وجزء احتفظ بيه نقديه.يبقي مجموع كل الاستخدامات او الاصول = مجموع الالتزامات او الخصوم= 300000 لكل جانب.
لاحظ كويس جدا ان فيه بنود جديدة الاستخدامات او اصول وبنود اخري جديدة التزام او خصوم.
.دي جزئية مهمة جدا اني اقدر افرق بين العنصر اللي قدامي هو اصل ولا خصم من بدايته.
يبقي نقدر نقول اي مصادر اموال خصوم واي استخدامات للاموال اصول .
ونجهز مع بعض شوية اصول (يعني استخدامات للاموال) ممكن نقول
الاصول
- اراضي
- مباني
- الات
- سيارات
- معدات
- عدد وادوات
- اثاث
- نقدية
- بنك
- بضاعة
- مدينين
- اوراق قبض
- اوراق مالية .الخ
ونقدر نقول شوية خصوم
الخصوم
- راس المال
- قرض
- دائنون
- اوراق دفع..... الخ
اذا عرفنا نفرق كويس جدا بين الاصول والخصوم هنلاقي قيود اليومية سهلة جدا.
نرجع عشان قيود اليومية ونفترض ان المشروع هيشتغل الصبح عملي
يبقي هوه انهارده وقبل الافتتاح عبارة عن اصول في الكفة اليمين تقابلها خصوم في الكفة الشمال والاتنين متساوين.
مفروض بعد كل عملية تحصل يظل التوازن ده موجود ازاي؟
يعني لو فرضنا اشترينا بضاعه ودفعت تمنها نقدي هلاقي البضاعة اصل وزاد يعني هتتحط في الكفه اليمين (اصول) وهلاقي النقدية اصل ونقص بنفس القيمة يعني هيتشال من الكفه اليمين يبقي الميزان هيتوازن تاني لان الكفه اليمين فيها حاجة زادت وحاجة نقصت.
طيب لو اشتريت بضاعه ومدفعتش حقها يبقي البضاعة زادت عندي ورقم الدائنين زاد عندي لاني مدفعتش.
يبقي هلاقي البضاعه اصل وزاد في الكفة اليمين والدائنين خصم وزاد برضه بس في الكفه الشمال يبقي التوازن لازال موجود.
اقدر دلوقتي وبناء علي الفكرة دي احطلك مجموعة قواعد تطبقها علي اي عملية تقابلك فيها اصول او خصوم.
هو فيه عمليات ممكن متبقاش اصول او خصوم؟
يوه بس هناجلها شويه لما نعرف الاصول والخصوم. .🥱
- اذا زاد الاصل يصبح مدين ويسجل في اليومية من ح/هذا الاصل (باسمه)
- اذا نقص الاصل يصبح دائن ويسجل في اليومية الي ح/ هذا الاصل
- اذا زاد الخصم يصبح دائن ويسجل في اليومية الي ح /هذا الخصم
- اذا نقص الخصم يصبح مدين ويسجل في اليومية من ح /هذا الخصم
لاحظ ان الاصل مولود مدين فاذا نقص يبقي عكس اتجاهه والخصم مولود دائن فاذا نقص يبقي عكس اتجاهه.
.اما زيادة اي منهما فيبقي في ذات اتجاه مولده.
طبعا هنكمل بعد كده وهنطبق عملي واحده واحده لغاية ميبقي الموضوع بسيط جدا تابعونا
هنتكلم فى الموضوع اللى جاى عن هل كل المعاملات المالية خلال العام ستكون متعلقة بالاصول والخصوم فقط ؟
طبعا هنكمل بعد كده وهنطبق عملي واحده واحده لغاية ميبقي الموضوع بسيط جدا تابعونا
هنتكلم فى الموضوع اللى جاى عن هل كل المعاملات المالية خلال العام ستكون متعلقة بالاصول والخصوم فقط ؟
الاجابة لا طبعا لان هناك مصروفات وايرادات تحدث اثناء العام ويتم قيدها في اليومية وهي ما سنتعرف عليه من خلال الرابط التالى 👇👇
المصدر " محاسبين ومحاسبة "
أضف تعليق